Ku läät Väherult üle raudtii Lüllemäe pääle, jääs tii pääle Kirbu külä. Inne Kirbu silda harones üts tii põhja tsihin Valtina poolõ. Seo tii veeren Saviku talo tiiotsast umbõs puul kilomiitret edesi jõvvat mõtsa vaihele ja hääd kätt küländ tii veeren paistus arheoloogilist mälestist märkvä valgõ silt, kos om kirän, et ohvrikivi II aastagatuhandõst. Kaardi pääl näüdäs, et seod om nimmatu Kirbu ohvrikivis ja Tarsali ohvrikivis. Üts om külä perrä, tõnõ lähiksel olõva talo perrä. Vana tii om lännü kivi lähikselt läbi mõtsa Tarsali vai Tarsilla talo manu.

Kirbu ohvrikivi / Tarsali ohvrikivi

Om põimukuu algus, hain viil korgõ ja kivvi hinnäst häste ei paistuki. Nätä, et tükk aigu olõ-i kiäki tan käünü. Sõkkami haina ümbre kivi kavvõmbalõ. Sõski, kivi pääl paistuse samblõ ja lehekõdu vaihel mõnõ rahatükü ja – kreeka pähkmäs, sääne pruunis tõmmanu. Ju sõs om jah andide tuumise kivi. Peotäüs ruusakivvõ om kivitsompa saanu arvada tiihooldusõ massina puult. Pandsõmi ummi vasitsit münte kivi pääle tõisile seltsis kivi väke kasutama. Või õnnõ arvada, mis aigõ ja inemiisi ummi pallõmiisiga seo kivi või olla nännü. Tan Kirbu suu veeren om viil mitu pühäkotust.

4. august 2022

Külli Eichenbaum

Tällä valinnalla kuvaaja antaa kuvan Creative Commons 3.0 lisenssin ehtojen mukaiseen vapaaseen käyttöön. Kuvaa voi käyttää ilmaiseksi voittoa tavoittelemattomissa tarkoituksissa ja kuvaajalle viitatessa.

7677 /